Plantefagbygningen 2022

I campusplanen frå 2018 låg det ei bestilling på at plantefagsmiljøa skulle samlast nærare Senter for klimaregulert planteforsking (SKP). Miljøa var spreidde i mange ulike bygningar på campus. Etter fleire utgreiingar og ulike forslag til plassering, vart det beslutta å leggje bygningen på baksida, altså sørsida av Senter for klimaregulert planteforsking. Eit område som er heilt i kanten av parkens vernesone og som har ei fantastisk utsikt.

I 2020 hadde DARK Arkitekter skisseprosjektet klart. Ein bygning knytt til SKP med glasgang, med 65 arbeidsplassar og møteplassar over to etasjar og kjellar. Sjølve prosjektet vart gjennomført som ein samspelsentreprise og vart gjennomført stort sett på tid, sjølv om covid-epidemien hadde innverknad på prosjektet.

Arkitekt Roar Lund Johnsen teikna ein nøktern og robust bygning, med fleksibel planløysing og med gode møteplassar. Han la i sitt arbeid vekt på at bygget skulle passe til dei omkringliggjande verna bygningane og parkområdet. Hans val av reine liner i utforming av bygningen og val av teglstein som materiale var bevisst og vellukka. Allereie same dag som stillaset vart tatt ned, opplevdes det som om bygningen alltid hadde vore der.

Bygningen har 65 arbeidsplassar og eit undervisningsrom med avtrekksskap. Dette skal i hovudsak nyttast til undervisning innanfor ulike planterelaterte emne som til dømes plantebioteknologi og plantefysiologi. Plantefagsbygningen er eit lågenergibygg med takkonstruksjonen i massiv tre som er tilrettelagt for eventuelle framtidige solcellepanel. Bygningen har trelagsvindauge og er svært energieffektiv. Testar viser at varmetapslekkasjen er innanfor kriterium for passivhus.

I tidleg fase av prosjektet vart det jobba mykje med skyggeberekningar og plassering, slik at den nye bygningen ikkje skulle skygge for eksisterande veksthus i området. Det vart også gjort tiltak for å sikre at infrastrukturen knytt til Senter for klimaregulert forsking ikkje skulle bli øydelagt eller påverka i byggeperioden eller for ettertida.

Bygningen var ferdig i desember 2022 og vart tatt i bruk i januar 2023. Bygningen er på 1350 kvm (BRA) og vart sett opp til ein kostnad på 70 millionar kroner.